Acorro é un punto de inflexión na carreira de Caldo. Neste tema integran a tradición galega máis pura nun contexto sonoro máis progresivo, ata case rozar o punk, pero sempre interpretado con instrumentos acústicos (guitarra, violín, pandeireta e gaita). Esta antiga melodía tradicional, foi aprendida dunha recollida das mulleres pandeireteiras de Tordoia (A Coruña). Acorro é o primeiro adianto do segundo disco de Caldo, que verá a luz en outono de 2022.
Dispoñible en todas as plataformas dixitais.
Música: Arranxo de Caldo sobre unha melodía tradicional da zona de Tordoia.
Letra: Caldo / tradicional.
Gravación e mestura: Alberto Cernadas (CRNDS)
Realización, edición e animación: Montse Piñeiro e MeliMolita
María Jorge (violín), Anaïs Barbier (voz e pandeireta) e Pedro Fariñas (guitarra e gaita) forman Caldo, un trío afincado no Valmiñor que achega a música tradicional a contextos sonoros contemporáneos a través da experimentación cos propios instrumentos. Presentan unha proposta na que integran melodías
tradicionais galegas e composicións propias con influencias das músicas europeas e atlánticas, unha fusión natural que vai directa ao sentir do público.
Para o seu primeiro disco, gravado en directo, tomaron como fío condutor o repertorio da aldea de Moscoso (Pazos de Borbén, Pontevedra), facendo una revisión do material recollido por Xisco Feijóo ás informantes Rosa e Aída Garrido.
Caldo preparan agora o seu novo traballo discográfico, no que afianzan a súa sonoridade engadindo novas texturas e atmósferas, sen abandonar o son orgánico dos instrumentos que empregan. O álbum, que sairá neste 2022, estará formado por melodías instrumentais de composición propia e por pezas con voz aprendidas do repertorio da tradición oral galega. Nesta nova etapa, escriben e reinterpretan as letras, escolléndoas coidadosamente para adaptalas ás novas realidades.
