Damos a benvida a Luneda Producións a Caldo, o trío do Valmiñor formado por María Jorge (violín), Anaïs Barbier (voz e pandeireta) e Pedro Fariñas (guitarra e gaita). Caldo achegan a música tradicional a contextos sonoros contemporáneos a través da experimentación cos propios instrumentos. Presentan unha proposta na que integran melodías tradicionais galegas e composicións propias con influencias das músicas europeas e atlánticas, unha fusión natural que vai directa ao sentir do público.
Neste mes de marzo presentaremos un novo videoclip co single adianto do que será o seu vindeiro disco, que sairá neste 2022. Un disco no que afianzan a súa sonoridade engadindo novas texturas e atmósferas, sen abandonar o son orgánico dos instrumentos que empregan.
