Liserxia pangalaica en forma de melodías psicodélicas, cantos pastorais e ritmos tribais envoltos en ecos
de tempos pasados. Así se definen os coruñeses Moura, unha das bandas máis interesantes da música
galega e sen dúbida tamén do panorama rock estatal, cunha proposta a medio camiño entre a neo-
psicodelia, a música tradicional, o rock progresivo e o kraut-rock.
Despois da súa consolidación con “Axexan, espreitan” (2022, Spinda Records), o seu segundo traballo de
estudio co que acadaron un grande recoñecemento da crítica especializada de todo o mundo, preparan
agora o seu novo lanzamento, que verá a luz en maio de 2024. Neste novo EP continúa a súa exploración
da tradición galega a través da psicodelia, con novas composicións que formarán tamén parte da BSO
dunha curtametraxe da que pronto se desvelarán os detalles. Experimentación, arrolos e vellos ritos terán
presenza nas novas cancións, que prometen ser outro paso máis no persoal percorrido artístico de Moura.
O disco “Axexan, espreitan”, que os seguirá acompañando nos concertos deste 2024, chegou tras o
lanzamento do seu debut homónimo (2020) e do sinxelo “Muiñeira da Maruxaina” (2021). Neste disco
afondaron aínda máis na tradición galega, tanto a nivel lírico coma instrumental, dando unha nova
perspectiva moito máis ampla ás músicas de tradición oral. Grazas á singularidade da súa proposta e á
contundencia dos seus directos, conquistaron ao público de citas tan relevantes como o Resurrection Fest, Monkey Week, Barcelona Psych Fest, Sonic Blast (PT) ou Volcano Sessions (FR), entre outras.
