XIRA 2023-2024
UNHA NOITE NO INTERIOR DUNHA FAÍSCA
En marzo do 2023, Ruxe Ruxe presentaron “Unha noite no interior dunha faísca”, o seu agardado novo disco, unha evolución e un cambio significativo no son da banda. Despois de “O estraño falar dun monstro da aldea” (Lobicán Records, 2020), gravado con Kaki Arkarazo (Negu Gorriak) nos estudios Gárate de Andoain (Euskadi), a banda de Aríns sorprendeu co seu disco máis personal e máis traballado. “Unha noite no interior dunha faísca” (Lobicán Records, 2023) está producido por Xurxo Pinheiro, gravado nos Laboratorios Soyuz (Compostela) e editado en formato vinilo, acompañado de varias sorpresas. Pódelo mercar na nosa TENDA.
Tras 27 anos de carreira, Ruxe Ruxe pechan agora un 2023 cheo de concertos e festivais, facendo o que é sen dúbida o mellor directo da súa dilatada historia, nunha xira que continuará ao longo do 2024.
A banda é sen dúbida un referente do rock galego, movéndose á marxe dos grandes poderes da cultura, das modas e do politicamente correcto. “Co espírito de loita por bandeira, do rock do país, do rock libre e de combate, do realismo máxico e do corpo a corpo sincero, directo e emocional”, a esencia do ADN dos Ruxe Ruxe queda patente en cada disco editado e en cada concerto que deron dende os seus inicios no ano 96. “Ser de aquí e dun tempo” que diría Celso Emilio Ferreiro, “rapaces da aldea máis non uns ninguéns” que diría Xosé Neira Vilas.
O grupo naceu en Aríns en 1996 con catro amigos do instituto, tres dos cales (Xan Pericán, Xaco Barona e Vituco Neira) conforman agora o núcleo veterano da banda. En 1999 sacaron o seu primeiro disco, de título homónimo. Ademais de 14 LP’s, teñen varios EP’s, unha banda sonora, unha curtametraxe, un documentario sobre o grupo e incontábeis colaboracións.
O seu 25 aniversario celebrouse cunha exposición que recolleu o universo gráfico do grupo, protagonizada por algúns dos deseñadores máis influentes da nosa historia recente. Ao mesmo tempo 32 bandas galegas rendéronlles homenaxe coa gravación do disco tributo “25 anos ruxindo”.
