XIRA 2025
XABRAL
RUXE RUXE é unha desas bandas que atesouran o bo facer cando máis se precisa. Tras 28 anos de carreira, a banda veñen de pechar un 2024 cheo de novas ilusións; de renovación e dun gran traballo de estudo. A comezos de 2025 publicouse Xabral, o novo disco producido por Kaki Arkarazo nos estudios Gárate, na montaña Gipuzkoana. E coa estrea do LP comeza unha xira por salas, polas salas que lles gustan e onde paran os amigos. Un dos conceptos que fan xermolar este novo traballo, no que tamén ten parte a figura de Shane McGowan, mítico músico de The Pogues, banda fetiche para os de Aríns, e que conta coa colaboración de Brian Brody, o nexo irlandés de Ruxe Ruxe.
Ruxe Ruxe son parte do acervo cultural do país, sempre arredados da moda e facendo o seu sólido camiño lonxe de ningunha concesión ao mercado, a feira festivaleira, a industria sedenta de última moda, aos discursos cómodos e interesados e ao políticamente correcto, mais sempre queridos por un público que os sitúa como unha das súas bandas rederenciais. Irredentos, libertarios, honestos e comprometidos coa terra, a cultura e o país agora presentan “Xabral” acadando o éxito absoluto de facer de cada estrea un disco mellor que o anterior. Rock do país, pub rock, punk actitude e cosmopolita, cancións certeiras, amplificadores vintage e monllos de telecasters no que para o grupo supón a militancia final na maneira de entender o rock como as bandas clásicas ás que admiran . Dende o “Xabral”, no corazón de Aríns.
O grupo naceu en Aríns en 1996 con catro amigos do instituto, tres dos cales (Xan Pericán, Xaco Barona e Vituco Neira) conforman agora o núcleo veterano da banda. En 1999 sacaron o seu primeiro disco, de título homónimo. Ademais de 14 LP’s, teñen varios EP’s, unha banda sonora, unha curtametraxe, un documentario sobre o grupo e incontábeis colaboracións. O seu 25 aniversario celebrouse cunha exposición que recolleu o universo gráfico do grupo, protagonizada por algúns dos deseñadores máis influentes da nosa historia recente. Ao mesmo tempo 32 bandas galegas rendéronlles homenaxe coa gravación do disco tributo “25 anos ruxindo”.
