Ao

cabo

leirín

FAIA
Ao cabo leirín

 

Ao cabo leirín é o primeiro disco de FAIA, un traballo no que a cantante dialoga cos espazos que elixe, dende a esquina solitaria da taberna ao quentar das mans na cheminea. Movéndose entre o aire limitado dun roupeiro, metendo a lingua entre os dentes ou buscando o seu reflexo na auga.

 

Ao cabo leirín é ao mesmo tempo un proxecto de investigación arredor das músicas, das mulleres que as cantan, das historias; pero tamén de investigación da súa propia voz, de escoitarse nos diferentes espazos.

 

Na gravación, só a voz espida de FAIA e o acompañamento sonoro dos momentos, sen postprodución e sen efectos.
Preséntase en formato vinilo. Na cara A, a reinterpretación libre de FAIA de 6 cantos procedentes de diferentes arquivos. Na cara B, as gravacións orixinais, as voces das mestras da palabra.

 

 

PRESENTACIÓN_ No directo atopamos un espectáculo íntimo, unha experiencia diferente na que deixarse levar pola verdade do canto. A voz e as percusións tradicionais de FAIA están acompañadas por Benxamín Otero no corno inglés e a caixa de música e por Hevi no son e na produción. Completa o espectáculo un prato no que xira a cara B do vinilo, sendo a interactuación cos arquivos, co noso patrimonio sonoro, coas nosas mulleres, unha parte importante e especial do concerto.

 

Todos os audios e os vídeos en faia.gal


Faia Díaz Novo é cantante e licenciada en Historia da Arte pola Universidade de Santiago de Compostela. Foi bolseira na Habana, Perugia e Barcelona, onde cursou estudos de etnomusicoloxía, cine e crítica artística. Realizou un curso de Dixitalización do Patrimonio Artístico pola UNED e un Mestrado en Xestión do Patrimonio Arquitectónico, Museos e consumo de Arte pola Universidade de Santiago de
Compostela. No 2015 traballou na Biblioteca de Galicia, catalogando e dixitalizando os fondos antigos da mesma.


Como cantante, é fundadora e integrante do grupo musical De Vacas dende 2015, e do Coro Encaixe. Tamén traballa na locución e gravación de diferentes materiais didácticos para o ensino en galego dende o ano 2013.

Coa contadora Vero Rilo participa no proxecto A Patacón, onde misturan narración e canción sobre historias familiares de tradición oral.

 

Faia forma parte de Mulleres e Wolframio, grupo de traballo que nace no contexto das Xornadas de Investigación Compartida coa artista plástica Eva Lootz, organizadas dende área de educación do CGAC no 2016. Inicialmente indagando no papel das minas de wolframio en Galicia durante a Segunda Guerra Mundial, así como nas repercusións que a extracción dese metal tivo no tecido social galego, o grupo centrouse no papel das mulleres.

Dende comezos do 2017, realiza un proceso de documentación e investigación que pon a ollada nas experiencias concretas de extraballadoras da mina, nas súas lembranzas, músicas e sentimentos.

 

Agora Faia presenta Ao cabo leirín, un traballo de investigación arredor das músicas, das mulleres que as cantan, das historias; pero tamén de investigación da súa propia voz, de escoitarse nos espazos e nos momentos.

Gravado por Hevi (Malandrómeda, Fluzo) durante 2018 e editado en Abril de 2019, o disco preséntase en formato vinilo como un obxecto fermoso, mas tamén en dixital para descarga libre.

  • Facebook
  • Instagram
Luneda Producións | 646 165 044
 info@luneda.gal | luneda.gal