GAIZCA PROJECT

GAIZCAPROJECT_fotodeLieve BOUSSAUW.jpg

GAIZCA PROJECT

 

GALIZA | EUSKADI | CATALUNYA

IALMA | IÑAKI PLAZA | MANU SABATÉ

 

Proxecto de creación para o encontro das músicas tradicionais e populares galegas, vascas e catalás, desde unha óptica contemporánea, de apertura ao mundo e aos tempos.



GAIZCA PROJECT naceu en 2018 despois dun longo proceso que levou a estas artistas ao encontro e a colaboración:

En 2013, organízanse en Bruxelas os festivais «Fenêtre ouverte sur la Catalogne» e «Fenêtre ouverte sur le Pays Basque», dous grandes eventos onde por en valor a riqueza e a diversidade deste territorios. O trikitilari Iñaki Plaza actúa no festival dedicado a Euskadi e alá coñece a Ialma, belgas fillas da emigración galega, ás que invita a cantaren un tema do seu repertorio. En contrapartida, Ialma invitan tamén a Iñaki Plaza a colaborar con elas, chegando incluso a incluíren esas colaboracións nos seus traballos discográficos.

 

En 2017, grazas aos encontros xerados pola FIRA MEDITERRÀNIA DE MANRESA, as integrantes de Ialma coñecen o músico catalán Manu Sabaté. Aí mesmo e co apoio de Lluís Puig e Rut Martínez, reúnense para daren forma ao proxecto e organizar unha residencia de creación no DANSÀNEU - FESTIVAL DE CULTURES DEL PIRINEU 2018.

 

A presentación oficial de GAIZCA PROJECT fíxose no marco da Fira Mediterrània de Manresa 2018, baixo o nome de Galeuscat, nun pequeno showcase só para profesionais que espertou un grande interese entre as programadoras.


En 2019, tras outras dúas residencias de creación en Euskadi e en Bélxica, gravaron o seu primeiro disco, con presentacións no Festival Compostela (Bruxelas, Bélxica), Rudolstadt Festival (Alemaña), Festival Demandafolk (Burgos), Música al Parc (Olot, Cataluña), Ligat Festival (Puilaurens, Francia),  Weltmusik Fest (Bélxica), Festival Tradicionàrius (Barcelona) ou Festas do Apóstolo (Santiago de Compostela), entre outras. En  Outubro de 2019, amais, volveron á Fira Mediterrània de Manresa para ofrecer un exitoso concerto na xornada inaugural.

En 2020 a meirande parte da súa xira viuse cancelada, con varias datas confirmadas en Corea do Sur, Alemaña, Portugal, Francia e Catalunya, incluíndo as feiras profesionais Seoul Music Week e EXIB Setúbal, onde contaban con showcases oficiais.  Neste 2021, abre e súa axenda o festival Etnomusic con dúas datas en València e Gandia.

 

AS ARTISTAS

 

GAIZCA PROJECT xurde da unión entre Ialma (Galiza/Bélxica),

Iñaki Plaza (Euskadi) e Manu Sabaté (Catalunya).


 

IALMA

 

Non hai unha asociación máis evidente que a palabra camiño coa cidade de Compostela, sobre todo cando esta asociación chega desde unhas das súas embaixadoras máis orgullosas, as galego-belgas Ialma. Estas catro pandereteiras levan 20 anos exportando a música tradicional galega por todo o mundo desde a óptica da emigración. O seu último disco, “Camiño”, fala precisamente disto, dos camiños nos que a aventura e a liberdade son importantes, onde atopar fontes das que beber doutras culturas e nos que atopar moitas artistas coas que crear novas experiencias, como Mercedes Peón, Dulce Pontes, Carlos Núñez, Kepa Junkera, Eliseo Parra ou Quique Peón, pero tamén Arno, Zefiro Vuelve, Philippe Catherine, Renaud, Dick Van der Harst, Urban Trad, Rose Perry, N’Faly Kouyate, Manou Gallo, Lucilla Galeazzi, Carlo Rizzo, Quentin Dujardin, Galia Benali, Leila Amezian...
 

Aínda que residentes en Bruxelas, Verónica, Natalia, Eva e Marisol están nunha relación constante e vital co seu país de orixe. A cultura e as tradicións galegas son de feito esa inspiración que lles permite construíren un repertorio de cancións e danzas tomadas das súas raíces pero adaptadas á súa nova realidade: a de mulleres de hoxe en día, en contacto con diversas culturas, varios idiomas e varias estéticas musicais.

 

Máis información: 
https://sceneoff.com/artists/ialma-2/

 

IÑAKI PLAZA

 

Iñaki Plaza (Urduña, Bizkaia, 1976), é un dos músicos máis destacados de Euskadi. É trikitilari e txalapartari, pero tamén domina outras percusións do mundo.

Desde 1994 formou parte dos grupos de trikitixa “Izalde” e “Sorbeltz”. De 2001 a 2007 foi txalapartari, percusionista e trikitilari das bandas de Kepa Junkera, Ibon Koteron e Etxak. Ata 2012 traballou tamén co músico Ion Garmendia no proxecto “O+Hatz”.

 

Colaborou en grabacións de grupos como Berrogüetto, Faltriqueira, Tejedor, Coetus, Kila ou Susana Seivane entre moitos outros, e participou en diferentes xiras como músico acompañante por todo o mundo.

 

Imparte clases de trikitixa, txalaparta e percusións tradicionais desde 1996 en diferentes escolas de Euskal Herria e impartiu tamén seminarios en lugares coma o Instituto Cervantes de Chicago (EEUU), o Museo de Instrumentos de Múnic ou a Universidade de Reno, Nevada (EEUU).

 

Máis información: 

http://es.inakiplaza.com/

 

MANU SABATÉ

 

Manu Sabaté (Barcelona, 1989) obtivo o Grao Superior de Música na ESMUC (l’Escola Superior de Música de Catalunya) coa gralla como instrumento principal. Tamén ten o mestrado en Músicas do Mundo pola Sibelius Akademy (Helsinki, Finlandia) e o mestrado en Xestión Cultural por la UOC (Universitat Oberta de Catalunya).

 

Foi un dos primeiros músicos cataláns en levar a gralla fóra do seu contexto habitual, a música tradicional, e experimentar con novos xéneros e linguaxes como a improvisación. Tamén toca o clarinete, o clarinete baixo, a tenora e a tarota.

Manu lidera Inxa Impro Quintet desde 2012, co que ten publicados tres discos que fusionan a música tradicional, o jazz e o rock.
En 2014 publicou “Buurr” con FolkMus, un proxecto da Unión Europea que reúne músicos e músicas de diferentes nacionalidades.
En 2015 empezou tamén co grupo NewCatalan_Ètnic, co que materializou o disco “Ruralisme Il·lustrat”.
En 2017 publicou o disco “Spontus & Manu Sabaté”, proxecto nacido en 2014 da colaboración co grupo de folk bretón Spontus, e entrou a formar parte da banda de Kepa Junkera para o disco e xira “Fok”.   

Colaborou en numerosos proxectos doutros músicos, tanto discográficos coma no directo. Actualmente é docente de l’Aula de Sons de Barcelona i Vilafranca e de l’EMAP (Escola Municipal de l’Alt Penedès). Foi profesor tamén de l’Aula de Sons de Reus, do CAT de Gràcia, da escola de música municipal de La Garriga e de Sant Sadurní d’Anoia, da escola barcelonesa MúsicActiva e das colonias para xoves intérpretes folk de Arsèguel.

 

Máis información: 

www.manusabate.cat 

 

 

GAIZCA PROJECT AO VIVO | FORMACIÓN:

Ialma (Marisol Palomo, Verónica Codesal, Eva Fernández e Natalia Codesal) – voces e percusións tradicionais
Iñaki Plaza – trikitixa e txalaparta
Manu Sabaté – gralla e tenora
Ciscu Cardona / Hugo Franco – guitarra
Kepa Calvo – batería e txalaparta