Damos a benvida á nosa casa a Moura -a nova incorporación a Luneda-, unha das bandas máis interesantes do momento, unha proposta a medio camiño entre a neo-psicodelia, o rock progresivo e a música tradicional galega.
Facendo equipo co seu selo, Spinda Records, levaremos o seu agardado ‘Axexan, espreitan’ a algunhas das programacións estatais máis destacadas, abrindo novos camiños para o prometedor futuro desta formación.
Os galegos MOURA lanzaron en maio do 2022 o seu agardado segundo disco de estudio, ‘Axexan, espreitan’, dous anos despois da edición do seu debut homónimo e do posterior sinxelo “Muiñeira da Maruxaina” (2021). Con este novo traballo no que profundizan aínda máis na tradición galega e coa súa impecable traxectoria, acadaron o recoñecemento da crítica máis especializada, o que os levou a actuar en citas tan importantes como Resurrection Fest, Monkey Week, Sound Isidro, Sonic Blast, Festival de la Luz ou Los Conciertos de Radio 3, entre outras. 2023 será un ano para continuar presentando ‘Axexan, espreitan’ ao vivo e embriagar co seu aquelarre sonoro a todas as persoas que presencien algún dos seus concertos.
