logo trans molon.png
RUXE RUXE

Con 26 anos de traxectoria e 12 LPs no mercado, Ruxe Ruxe están no seu mellor momento. Despois de celebrar o seu 25 aniversario polo país adiante e tamén por Euskadi, na primavera de 2022 poderémolos ver nas mellores salas do país, así como polo verán nos mellores festivais, entre eles o Resurrection Fest. E todo isto irá acompañado por adiantos das cancións que conformarán o novo disco, que presentarán este ano e que promete ser o máis singular da súa carreira.

Ruxe Ruxe é sen dúbida a banda referente do rock galego. É, por méritos propios, unha das bandas galegas máis lendarias.  Movéndose á marxe dos grandes poderes da cultura, das modas e do políticamente correcto. Co espírito de loita porbandeira, do rock do país, do rock libre e de combate, do realismo máxico e do corpo a corpo sinceiro, directo e emocional, a esencia do adn dos Ruxe Ruxe queda patente en cada disco editado e en cada concerto que deron dende os seus inicios no ano 96.“Ser de aquí e dun tempo” que diría Celso Emilio Ferreiro.

 

“Rapaces da aldea máis non uns ninguéns” que diría Xosé Neira Vilas. 

 

RUXE RUXE foi, é e será unha banda de culto. As súas cancións son banda sonora en películas, anuncios de TV e programas deportivos, e xa forman parte da memoria colectiva dunha parroquia de galegos e galegas que sempre lles agasalla o seu cariño, admiración e respecto.

Ruxe Ruxe naceu en Aríns en 1996 por catro amigos do instituto, tres dos cales (Xan Pericán, Xaco e Vituco) son aínda, e 25 anos despois, o núcleo veterano da banda.  En 1999 sacaron o seu primeiro disco, de título homónimo, composto por oito cancións, e ao ano seguinte saíu Non temos medo, un traballo que constou de 14 temas e que foi gravado e mesturado en Madrid. Nesta época a banda chegou a estar formada por nove membros.

Os 25 anos que seguiron ata hoxe deron para moito, con 12 discos de estudio, algúns deles paridos nos mellores estudos, como é o caso de "O estraño falar dun monstro da aldea", gravado nos Estudios Gárate de Andoáin con Kaki Arkarazo (Negu Gorriak, Kortatu), dous EP’s, unha banda sonora, unha curtametraxe, o documental Sempre Adiante sobre o grupo, dirixido por Jairo Iglesias e incontábeis colaboracións, entre as que podemos salientar a Goldi, Xosé Bocixa, Julián Hernández, Maestro Reverendo, Alonso Caxade, Xabier Díaz, Dios ke te crew, e un interminábel etcétera. 

 

Tocaron en incontábeis festivais do país e fixeron xiras que os levaron ininterrumpidamente polos mellores escenarios, tamén alén das nosas fronteiras e sempre con moi boa acollida tanto polo público como pola critica. Colaboraron con bandas como Boikot ou Siniestro Total e teñen compartido palco con Molotov, Gwendal, Wolfstone, Status Quo, Reincidentes ou Def con Dos, entre outros.

  • Facebook Ruxe
  • Spotify Ruxe
  • YouTube Ruxe
  • Twitter Ruxe
  • Instagram Ruxe

AO DÍA